मुंबई : केंद्रीय अर्थसंकल्प काही दिवसांपूर्वी सादर झाला. आता राज्याचा अर्थसंकल्प सहा मार्चला सादर होणार आहे. या पार्श्वभूमीवर, अर्थसंकल्प समजून घेण्यासाठी कोणालाही मार्गदर्शक ठरेल, असे पुस्तक माजी मुख्यमंत्री आणि विद्यमान विरोधी पक्षनेते देवेंद्र फडणवीस यांनी लिहिले असून, ‘अर्थसंकल्प सोप्या भाषेत’ असे त्याचे नाव आहे. विधानभवनात नुकतेच त्याचे प्रकाशन झाले. त्याचे ई-बुक मोफत उपलब्ध असून, त्याची लिंक शेवटी दिली आहे.
‘अर्थसंकल्प मांडणे हे जसे क्लिष्ट काम आहे, तसाच तो समजून घेणे आणि समजावून सांगणे हेदेखील अतिशय क्लिष्ट काम आहे. अर्थसंकल्प सोप्या भाषेत समजावून सांगणारे, ‘अर्थसंकल्प सोप्या भाषेत’ हे मराठीतील पहिलेच पुस्तक आहे,’ असे मत मुख्यमंत्री उद्धव ठाकरे यांनी व्यक्त केले. ठाकरे यांच्या हस्ते पुस्तकाचे प्रकाशन झाले. त्या वेळी ते बोलत होते.
‘अर्थसंकल्पात आर्थिक नियोजन मांडले जाते, तो पैसा सर्वसामान्य नागरिकांचा असतो आणि त्याचे नियोजन कसे केले गेले हे त्याला कळलेच पाहिजे. त्यामुळे अर्थसंकल्पाची भाषा ही सोपीच असावी. तथापि, काही अर्थसंकल्पीय परिभाषांना पर्याय नसतो, त्या परिभाषा या पुस्तकातून समजतील,’ असा विश्वास ठाकरे यांनी व्यक्त केला.
योग्य पुस्तक, योग्य वेळी वाचकांच्या हाती पडत असल्याचे मत उपमुख्यमंत्री अजित पवार यांनी या वेळी व्यक्त केले.
‘अर्थशास्त्राचे विद्यार्थी आणि अभ्यासक यांना, तसेच सर्वसामान्य नागरिकांनाही हे पुस्तक अतिशय उपयुक्त ठरणार आहे. अर्थसंकल्पावर ज्या चर्चा होतात, त्या संबंधित व्यक्तींच्या समजेवर अवलंबून असतात. या चर्चा अर्थसंकल्पाचे तांत्रिक विश्लेषण करून, आकडेवारीच्या आधारावर होत नाहीत. म्हणून अर्थसंकल्प कसा वाचायचा, हे अधिकाधिक लोकांनी समजून घेतले पाहिजे, असे मला वाटते. म्हणूनच हे पुस्तक लिहिले आहे,’ असे मनोगत देवेंद्र फडणवीस यांनी व्यक्त केले.
केंद्रीय अर्थमंत्री निर्मला सीतारामन यांची प्रस्तावना या पुस्तकाला लाभली आहे.
विधान परिषदेचे सभापती रामराजे नाईक-निंबाळकर, विधानसभेचे अध्यक्ष नाना पटोले, विधान परिषदेतील विरोधी पक्षनेते प्रवीण दरेकर आदी मान्यवर या प्रसंगी उपस्थित होते. कार्यक्रमाचे सूत्रसंचालन आमदार आशिष शेलार यांनी केले, तर विधान परिषदेच्या उपसभापती डॉ. नीलम गोऱ्हे यांनी आभारप्रदर्शन केले.
(‘अर्थसंकल्प सोप्या भाषेत’ हे पुस्तक मोफत डाउनलोड करण्यासाठी येथे क्लिक करा.)